Maqolada 11–14 yoshli bokschi qizlarda tezkor-kuch tayyorgarligini individuallashtirishning ilmiy-metodik asoslari nazariy tahlil qilindi. Individuallashtirishning kalendar yoshdan ko‘ra biologik yetilish, texnik tayyorgarlik darajasi, morfofunksional holat, nerv-mushak safarbarligi va yuklamaga individual javob bilan bog‘liqligi asoslandi. Ilmiy adabiyotlarni tizimli-qiyosiy tahlil qilish asosida sportchini tayyorlik profili bo‘yicha baholashga tayanuvchi konseptual metodik model ishlab chiqildi. Modelda biologik yetilish va boshlang‘ich diagnostika, tayyorlik profilini aniqlash, mos mashq vositalarini tanlash, joriy monitoring va yuklamani tuzatish o‘zaro bog‘langan bosqichlar sifatida ko‘rsatiladi. Taklif etilgan modelning asosiy xususiyati 11–14 yosh oralig‘idagi sportchilarni faqat pasport yoshiga ko‘ra guruhlashdan voz kechib, mashg‘ulot mazmunini biologik va texnik tayyorlikka moslashtirishdan iborat.